Ka dhjetëra herë që ligji për Rimëkëmbje Ekonomike nuk po kalon në Kuvendin e Kosovës, e kjo pasi partitë opozitare nuk po e përkrahin, shkruan Gazeta Express.

Me qëllim që të ndihmohen bizneset që kanë pësuar humbje nga pandemia e shkaktuar nga koronavirusi, Qeveria e Kosovës ka miratuar Projektligjin për rimëkëmbje ekonomike. Ky projektligj, pas gjashtë dështimesh për miratim në Kuvendin e Kosovës, ka arritur të miratohet në lexim të parë më 13 korrik.

Por, nga Partia Demokratike e Kosovës për Gazetën Express kanë thënë se kanë propozuar ligj të veçantë për menaxhimin e pandemisë dhe nëse ndryshimet e tyre nuk pranohen, ata prapë nuk do ta votojnë këtë projektligj.

“Ne i kemi qëndrimet e qarta tash e sa kohë, pa u ndryshu ligji nuk do ta ketë votën e PDK-së sepse nuk e ndihmon ekonominë e vendit, me ndryshimet dhe propozimet qe i kemi ne, ligji mundëson që për këtë fazë të ketë efekte pozitive në ekonomi”, ka thënë deputeti i PDK-së, Kujtim Gashi.

Anipse në mediat po raportohet se tashmë kanë filluar negociatat mes PDK-së dhe LDK-së për një marrëveshje për ta kaluar këtë projektligj, nënkryetari i PDK-së, Shaqir Totaj për Gazetën Express tha se nuk ka informacione nëse ka filluar ndonjë negocim i tillë.

Madje, Gashi tha se kërkesat e tyre janë të njohura për Qeverinë tash e sa kohë dhe sipas tij nuk ka nevojë të negociohen.

“Nuk besoj që ka nevojë të negociohen. Nëse ato merren parasysh në mbledhje kur vjen për votim ligji, vota jonë është PËR”, ka thënë Gashi.

Por, nga PDK-ja kanë treguar se në cilat pika kanë kërkuar ndryshim, pasi sipas tyre, këto ndryshime janë në interes të rimëkëmbjes ekonomike të vendit.

“Pagesat për punëtorët që kanë humbur vendet e tyre të punës të paguhen me nga 300 euro për 3 muaj. Heqjen e TVSh-së për importimin e lëndës së parë. Si dhe rimbursimin e mjeteve të trustit për ata që kanë deri në 10.000 euro. Pra këto janë kërkesat tona për ta votuar ligjin për rimëkëmbje, kërkesa këto që kanë dalë edhe nga diskutimet e shumta edhe me komunitetin e biznesit”, ka thënë Gashi.

Sipas tyre, ligji i propozuar nga Qeveria Hoti, në formën si është tani është tejet i mangët dhe nuk ndihmon sektorin privat, bizneset si dhe nuk do të ketë efekt në rimëkëmbjen ekonomike. /Express/

SHPËRNDAJE

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu