Komisioni LIBE ka mbështetur rinisjen e negociatave teknike me Këshillin e BE-së për heqjen e vizave për Kosovën. Por pavarësisht kësaj, sipas ekspertëve të integrimit, Kosova tashmë ka humbur shansin për ta finalizuar procesin e liberalizimit përgjatë këtij viti

Drejtori ekzekutiv i institutit të Kosovës për politika evropiane “Epik”, Demush Shasha, ka thënë se ndonëse kanë mbetur edhe dy takime të Këshillit të Bashkimit Evropian, deri më sot në mesin e vendeve anëtare nuk është gjetur konsensus që të procedohet liberalizimi i vizave për Kosovën.

Ai tha se institucionet e BE-së bëjnë planifikimin me kohë të të gjitha takimeve vendimmarrëse të BE-së.

Rrjedhimisht, siç tha ai, të gjitha takimet e Këshillit të Bashkimit Evropian deri në fund të vitit 2019 janë tanimë të dakorduara.

“Deri në fund të këtij viti do të mbahen edhe dy takime të Këshillit të Bashkimit Evropian për Drejtësi dhe për Punë të Brendshme. Deri më sot në asnjë nga takimet e planifikuara nuk është arritur që të gjendet konsensus në mesin e të gjitha vendeve anëtare dhe të procedohet me dakordimin për liberalizimin e vizave për Kosovën”, tha ai për ‘Zërin’.

Ndërkohë më 24 shtator 2019, Komisioni i Parlamentit Evropian për Drejtësi, për Punë të Brendshme dhe për Liritë Qytetare (LIBE) ka mbështetur rinisjen e negociatave teknike me Këshillin e Bashkimit Evropian për liberalizimin e vizave për Kosovën. Por sipas Demush Shashës kjo do të thotë që Komisioni LIBE vetëm ka përsëritur veprimin e 30 gushtit 2018.

“Arsyeja për përsëritjen e këtij votimi është sepse tanimë kemi legjislaturën e re të PE-së, e dalë nga zgjedhjet e majit të 2019-s dhe rrjedhimisht të gjitha proceset që nuk kanë përfunduar në legjislaturën e kaluar duhet të përsëriten. Tani hapi i radhës do të jetë që rekomandimi i Komisionit LIBE për rinisjen e negociatave me Këshillin e BE-së të votohet në seancën plenare të Parlamentit Evropian, e cila pritet të mbahet më 9 tetor 2019, në Bruksel”, ka thënë ai për “Zërin”.

Ai tha se rekomandimi i fundit i LIBE-s nuk duhet të shoqërohet me urime, por nuk duhet as nënvlerësuar. Sidoqoftë, pavarësisht rekomandimit të fundit të LIBE-së, sipas tij, janë katër faktorë të cilët janë duke penguar liberalizimin e vizave për Kosovën: mungesa e rezultateve të Kosovës në kuadër të luftës kundër korrupsionit dhe të krimit të organizuar, Raporti i Progresit nga BE-ja për vitin 2019, që identifikoi sfida të shumta në fushën e sundimit të ligjit, liberalizimi i vizave nuk është prioritet i institucioneve të BE-së për vitin 2019, mungesa e vullnetit politik për liberalizim të vizave.

Shasha tha se mbetet skeptik se institucionet e BE-së do të marrin vendim pozitiv sa i përket liberalizimit të vizave deri në fund të këtij viti. Gjasat sipas tij janë se i gjithë procesi do të shtyhet për vitin 2020.

“Gjatë vitit 2020 Presidenca e BE-së do të kalojë te dy vendet mike të Kosovës: Kroacia dhe Gjermania”, ka thënë ai.

Edhe Nezir Kraki, ligjërues i politikave të BE-së në Paris, ka thënë për “Zërin” se Kosova me shumë gjasë do të jetë e izoluar deri në pranverën e vitit tjetër.

“Çështja e vizave për Kosovën për fat të keq nuk është pjesë e asnjë teme aktuale brenda BE-së. BE-ja vetë gjendet në moment kompleks të tranzicionit institucional. Vetëm nëse ndodh ndonjë mrekulli në momentet e fundit, përndryshe Kosova është e izoluar të paktën deri në pranverën tjetër. Sepse mendoj që për disa në BE tema e vizave vazhdon të jetë njëfarë mekanizmi shtrëngues në kuadër të dialogut me Serbinë”, ka thënë ai.

Sipas tij, do të pritet që qeveria e re të rinisë dialogun e vjetër ose të ri dhe pastaj BE-ja do ta rifusë temën e vizave në paketën e presioneve/të ofertave

Loading...

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu